العودة   منتديات المصطبة > أقسام الأدب والرومانسية > منتدى الحب والرومانسية

منتدى الحب والرومانسية مواضيع الحب والرومانسية وكل ما يتعلق بالحب وأنواعه وأروع ما قيل فيه من كلمات


مواضيع ذات صلة مع يوميات قلب مجروح
صور قلوب مجروحة 2014 ، احلى صور جروح رومانسية قلبى مجروح صور جروح مجاريح جديدة حزينة موت 2015 من قسم صور 2014 - صور خلفيات - صور حب - صور منوعة
بعثرة قلم مجروح ؟؟ من قسم منتدى الشعر والخواطر
الى كل مجروح..... من قسم منتدى الشعر والخواطر
مذكرات رجل مجروح من قسم المنتدى العام للمواضيع العامة
انا مجروح من قسم المنتدى العام للمواضيع العامة

1 
Pīńķÿ Fļŷ

الفصل الاول من قلب مجروح:-



اليوميات دى تجربة انسان عاش اجمل قصة حب فى حياته وكانت سبب انه عاش اقسى قصة عذاب فى حياته احداثها حقيقية وحصلت فى اسماعيلية وبقدمهلكو للاستفادة والتسلية.

ملحوظة:تم تغيير اسماء وبعض اماكن وبعض احداث القصة الحقيقية حفاظا على حياة ابطال القصة و حفاظا على اسرارهم الشخصية
...



البداية:

!_ 1_البحث عن الحب والارتباط.:

بدات القصة دى من غير قصد يعنى مكنش مخطط ليها اساسا انها تبدا المهم بدات بشاب هو بطل القصة دى واسمه حازم فى كلية تجارة عايش عادى جدا زى اى شاب بيخرج وبيلعب كورة وبيروح وبيسافر وبيذاكر احيانا وبيموت فى حاجة اسمها عمرو دياب عنده كل حاجة فى الدنيا وفى فرحه او حزنه بيقفل على نفسه ويعيش مع عمرو.

لكن كان فيه حاجة نقصاه شايفها فى كل صحابه وكل اللى حواليه وكل اللى يعرفهم وهى انه يرتبط ببنت ويكون ليه حكايات وحواديت يحكيها زى كل صحابه ما بيجو يحكولوه ويتكلمو وكان دايما يسمع ويحل حتى مشاكل صحابه وينصحهم فى مشاكلهم لما يلجاؤلوه فى المواضيع دى انما هو عمره ما دخل عالم الحب دة كل علاقته كانت عن طريق سماع الحكايات كانت وجهة نظره انه لازم عشان يحب لازم يقابل بنت زى ما ابطال الحكايات والحواديت بيقابلو بناتهم عايز يعيش قصة اسطوريةعايز قصة حب جامدة تاخده بكل مشاعره وتفكيره .

كان عنده مشكلة كبيرة جدا فى مشكلة الحب دى انه خجول لاقصى درجة وعمره ما لكم بنت مش لان شكله وحش او حاجة بالعكس هو شاب مقبول واحيانا بيقولو عليه امور بس خجول لاقصى درجة ومبيعرفش يكلم كلمتين على بعض مع اى بنت ووشه يحمر ويشوف اى طريقة ويقلب منها اقصى حاجة كان بيكلم قرايبه البنات بالعافية.

حازم فى 3 كلية تجارة وكانت حكايات صحابه ابتدت تزيد واللى بيشوفوه من البنات بتوع اليومين دول وسنه انه كبر شوية وبقى فى رغبة جواه ابتدت تتولد انه عايز يرتبط عايز يحب عايز يحس احساس الحب دة ايه ويعنى ايه بنت تكون بتخاف عليه وبتغير عليه ويعنى ايه يكلمو مع بعض بالساعات على الموبيل وبيقولو ايه لبعض كل الوقت دة هما مش بيتخنقو يا عم ولا ايه دة الواحد لو كلم حد 5 دقايق بيبقى رغاى وخنقة وبيخرجو يروحو فين وبيقولو ايه فى الخروج حتى لما بيزعلو من بعض ويقفشو على بعض ويتخاصمو ليه ويرجعو يتصالحو وكان نفسه يجيلو هدية فى الفالنتين ويوم عيد ميلاده بنت تقوله كل سنة وانت طيب وتعمله ماجاة.

كل دى احاسيس ومشاعر عمالة تضغط على حازم عمالة توديه نحية طريق الحب والارتباط وهو من جواه خلاص اقتنع انه فعلا لازم يعيش الاحساس دة لدرجة انه حب البنت اللى فى خياله حتى من قبل ما يقابلها كان نسه ى بنت زى الحكايات والحواديت امورة وستايل ومحترمة وتحبه بجنون.

وفى يوم كان مع صحابه قاعدين فى كوفى شوب على طريق البلاجات يعنى وعمالين يكلمو شفت البنت مين مش عملت كذا كذا شفت مش عارف مين مش ساب اسمها ايه وراح مش عارف لمين طب شفت مش انا جيبت نمرة مين ورنتلها وكلمتنى وقالتلى مين وعايز منى ايه وكلمة فى التانية جابت معايا وايه وايه......كل دة وحازم مش معاهم معنيه عمالة تدور فى المكان كله على البنت اللى فى خياله وكل بنت تبصله يفتكر ان هى دى اللى بيحلم بيها تقوم قايمة مسلمة على واحد وتقف مع واحد تانى يروح قايل لا بلاش دى ويركز مع حد تانى ويفضل مركزلها من غير ما تحس طبعا يلاقى واحد جه قعد معاها ومع شلتها وادى دى كمان راحت.

ويخلص اليوم ويروح حازم ويفكر فى اللى بيحلم بيه ويشغل عمرودياب ويسمع اه بعد الليالى وينسجم مع عمرو لحد ما ينام ويجى يوم تانى خارج مع صحابه فى السينما ويقول النهارد هقابلها ويدخل وقبل الفيلم يشغل على موبيله اغانى عمرو دياب واكنه بيوجه رسالة للى بيحلم بيها عن طريق اغانى عمرو دياب ويفتكر ان فى واحدة من الموجودين هتحس بيه عن طريق الاغانى دى وهتعجب بيه لمجرد حبه لعمرو دياب ويبدا الفيلم وحازم دماغه فى احلامه وتيجى الاستراحة ويخرج حازم برة القاعة ومستنى يا ترى مين اللى هتيجى وتقوله انا معجبة بيك انت بتحب عمرو زى مش كدة.

فضل حازم على كدة شهور بيحاول على طريقته يقابل حلمه ولكنه فشل طبعا فشل ذريع لحد ما فى يوم لقى صحابه بيكلمو ازاى تثبت بنت اللى قال البنت عايزة الواد اللى يدخل فيها شمال تمشى زى الالف فى ايدك واللى قال لا انت تظبط واحدة صاحبتها وحشة وتوقلها انا معجب بكذا ما تظبطينى وهى توصلك ليها واللى قال لالا انت تعاكسها بكلمتين تضحك تدخل المهم ان كل الكلام دة ما ينفعش مع حازم لان ولا طريقة من دول تنفع معاه استحالة دة ولد فى قمة الخجل زى ما قولتلكو لحد ما سمع الراى دة.

قام واحد من صحابه زكى شوية قال لا انت تجيب ايميلها وتدخل تثبتها انا مجرب الطريقة دى وناجحة مليون فى المية لفت نظر حازم الفكرة دى ولعبت فى دماغه صح النت احسن حاجة كدة لا هيقابل حد ولا هيكسف ولا هيعرف ينطق ادامه يبقى هو النت والشات احسن طريقة ليا

راح حازم خد صاحبه على جنب وقاله انت بتقعد على النت وتعمل شات ازاى وايه احسن موقع وخد منه كل المعلومات ويعمل ايه ويبتدى الكلام ازاى ويقول ايه.

فرح حازم وقرر من جواه اول ما يروح هيطبق كل اللى سمعه وعرفه وهيتعرف على بنات على الشات ومن كلامه معاهم هيختار البنت اللى بيحلم بيها حاجة سهلة جدا وطريقة تنفع وتاكل معاه جامد اوى ولا فيها كسوف ولا اى حاجة لان هو مع صحابه لسانه 5 متر ودمه خفيف جدا انما كل مشكلته كانت مع الجنس الاخر.

خلص اليوم وسلم حازم على صحابه وسلم على صاحب اقتراح النت دة اكتر شوية من الباقى وروح ودخل حازم اوضته وفتح الكمبيوتر و ابتدى يهيا نفسه وهيدخل على الشات وكمان هيعمل لنفسه ايميل على الياهو والهوت ميل وابتدى حازم اول طريق تحقيق حلمه زى ما هو فاكر مكنش يعرف انه حط رجله على اول طريق هيعيشه بقية عمره فى عذاب وجراح وقصة عمره ما كان يتخيلها.





2 
Pīńķÿ Fļŷ

الفصل الثانى:-
2_:البحث عن الحب والارتباط:



دخل حازم على الشات وحط السماعات فى ودنه وشغل عمرودياب وابتدى شات وكان فرحان اوى وموهوم باللى شايفه بنات اشكال والوان واسامى تفتح النفس ولوجوهات وناس بتتكلم عام وفهم ان فى خاص وكل الكلام المعروف دة طبعا وابتدى يختار اسامى حلوة وجذابة عشان يكلمها وبدا هاى ...وهاى....وهاى.... ومفيش حد بيرد نص ساعة... ابتدى يزهق وفجاة ظهرت شاشة فيها هاى وجاله الرد وكان من احلى اللحظات فى حياته بنت ردت عليه وهيبتدى يكلم معاها ورد حازم وابتدى التعارف وهو فى قمة سعادته وانت منين وانتى منين وبتدرس ايه وكدة لحد ما لقى اللى بيكلمه طلع ولد وعامل نفسه بنت.

طبعا احبط جدا ولكن قرر يستمر لانه لقى الموضوع سهل وجميل جدا هو هيركز ويختار اسم تانى حلو ويكمل وهاى تانى وجاله الرد تانى وابتدى التعارف من جديد والكلام جا بعضه بعدين ملقاش رد اللى بيكلمها النت فصل وخرجت وجرب تانى ولقى المرة دى كل اللى بيكلمهم بيردو وبقى بيكلم 3 او 4 بنات فى وقت واحد ولكن المحادثة مش بتكمل للاخر او بيقولوه اتاخرنا ولازم نمشى وكدة. وقفل حازم الكمبيوتر وهو فى منهتى الفرحة صحيح ملقاش اللى هو عايزه لكن الحكاية عجبته اوى واول خطوة مشيت معاه صح وعرف ازاى يكلم ويرد وحس انه قرب من حلمه اللى مستنيه.

تانى يوم قابل حازم صاحبه حسام صاحب اقتراح النت وحكاله على اللى حصل بالحرف وكلم مين وحصل ايه بالمللى ضحك حسام جدا وقال لحازم انت عبيط ولا ايه يا ابنى حد يكلم ويسيب اللى بيكلمها فى الاخر تمشى ساله حازم امال اعمل ايه يعنى قاله اى واحدة تكلمها تروح سالها ممكن ايميلك عشان نبقى نتكلم تانى ونبقى صحاب يا اما تتطلب موبيلها على طول ولا انت هتضل مقضيها شات وخلاص.

وافق حازم على كلام حسام ولقى انه معاه حق وقرر يطبق اللى عرفه النهاردة مرة تانية ودخل حازم وهو بيسمع عمرو دياب كالعادة ودخل على نفس الشات وهاى من تانى...مين معايا مروة وانت؟ انا حازم ومنين وكام سنة ودراستك وبتسمع ايه وبتخرج فين والكلام جاب بعضه لحد ما جات لحظة انها هتقوم وحازم ظول الوقت عايز يقولها ممكن ايميلك بس بردو مشكلته الازلية بردو مكسوف للدرجادى ولما قالتله انا لازم امشى قرر يتشجع وسالها على ايميلها سالته عايزه ليه معرفش ينطق وجمع شجاعته وهو وشه احمر وقالها يعنى عشان عايز اتكلم معاكى تانى ونبقى اصحاب وجاله رد مش متوقع انا كمان بقيت بحب اكلم معاك وايميلى اهو.

طار حازم من الفرحة وسمع فى اليوم دة كل اغانى عمرو دياب اللى فيها فرحة وحب ومانامش لتانى يوم اول مرة بنت تكتبله انا كمان بحب اتكلم معاك فما بالك لو كانت قالتهاله فى وشه؟؟؟ وكمان اديته ايميلها.


ضاف حازم ايميلها واتفقوا كل يوم فى نفس الميعاد هيدخلو ويكلمو وفات عليهم حوالى شهر وشوية وابتدا حازم يحس بحاجات غريبة بقت كل فرحته لما بيكون ادام الكمبيوتر وبيكلم مروة عنده دى بالدنيا واللى فيها وبقى بيفكر فيها طول الوقت حتى وهو مع صحابه وهو بيلعب وهو بيذاكر واستغرب ايه اللى بيحصله دة وايه التغيرات دى ما يكونش دة اسمه ايه؟؟؟ وفضل حازم على الوضع دة بيحب مروة فعلا ومن كل قلبه من غير حتى ما يشوف صورتها ولا يسمع صوتها لحد ما قرر فى يوم هيقولها على كل اللى هو حاسس بيه بس لازم الاول يطلب منها نمرتها عشان يعر يكلمها ويقولها وفعلا طلب نمرتها واديتهاله مروة وطبعا زى اى بنت قالتله انا واثقة فيك ودى اول مرة ادى نمرتى لولد غريب والكلام المحفوظ دة وقالها انا عايز اقولك على حاجة مهمة جدا وهكلمك اتصل بيكى بكرة.



طبعا مروة ما نمتش زى اى بنت وفضولها الح عليها طبعا تعرف عايز ايه دة وايه الحاجة المهمة وضلت ترنله طول الليل عشان يكلمها و حازم هيطير من الفرحة طبعا رنات وموبيله ابتدى يشتغل وبنت بترنله الفجر ورسايل كمان لما كان هيموت من فرحته بكل دة والعالم اللى كان بالنسبه له خيال واحلام.


رجع حازم من كليته تانى يوم وطبعا مفهمش اى حرف لانه مفيش فى باله غير مروة واللى هيقوله لمروة واول مرة فى حياته هيسمع صوت بنت وهو بيكلمها كدة فى الموبيل وخرج حازم مع صحابه وهفيش بردو فى باله غير مروة وحتى ما سمعش منهم حاجة المرة دى واستاذن يمشى بدرى عشان يروح يكلم مروة ويحكيلها على كل اللى حاسه وروح حازم ومسك موبيله واتصل لاول مرة فى حياته ببنت ورن الجرس كتير اوى لحظة عدت عليه سنين وردت مروة الو......وحازم اتفزع ومن خوفه قل المكالمة وقلبه لبيدق زى ساعى بيج بن .....وما فاقش الا على رنة مروة وابتدى يجمع نفسه تانى واتصل مرة تانية ورد عليه صوت جميل الو... الو مروة ....حازم اخيرا سمعت صوتك.... حازم فى كسوف اه اخيرا انتىب قى مروة... اه انا وانت حازم بقى ... اه انا.
ايه رايك فى صوتى حلو....حازم متلخبط اه حلو اوى طبعا...يا سلام بجد...اه والله العظيم حلو اوى...انت كمان صوتك حلو اوى يا حازم...طبعا حازم بيتشال ويتحط وسافر كمان....ربنا يخليكى دة من زوقك.
كان فى حاجة مهمة عايزنى فيها امبارح يا ترى ممكن اعرفها...اه اه لا نسيتها مش مهم
لا يا حازم صوتك بيقول فى حاجة ولا انت كنت بتضحك عليا... لا والله انا مش بضحك عليكى خالص...لا انت كنت بتقولى كدة عشان تاخد نمرتى وخلاص مش كدة مهما كل الولاد كدة على الشات بس مكنتش عارفة انك زيهم...لا والله يا مروة انا مش زيهم ولا فى بالى كدة خالص...اوكى خلاص مش عايزة اعرف...خلاص طب هقولك بس توعدينى انك مش هتزعلى منى ايدا ولو اضايقت نفضل صحاب انا مبقتش اقدر استغنى عنك...اوعدك يا حازم قول اللى انت عايزه...مروة انا....ايه قول...مروة انا ....ها يا حازم انت ايه...مروة مفيش حاجة....والله هزعل منك انت بتهزر يا حازم وبتلعب باعصابى صح...لا والله هقولك بس هتصدقينى؟؟؟ايوة هصدقك قول...مروة انا معجب بيكى...يا سلام ميرسى كل دة عشان معجب بيا دى حاجة عادية يعنى...لا انا اقصد...ايه؟...مروة انا بحبك اوى ومش بفكر فى حاجة غير فيكى حتى وانا مع صحابى وانا لوحدى....ولو زعلتى اوكى بس انا تعبت وكان لازم اقولك اللى جوايا ومش عارف هتوعلى منى ولا.......حازم ممكن تسكت....انا كمان بحبك يا حازم.....بجد با مروة؟؟؟ بتحبينى بجد يا مروة...ايوة حبيتك بص لازم اقفل دلوقتى عشان ماما هتصحى ماشى هتوحشنى.....انتى كمان هتوحشينى اوى .


وقفل حازم ورغم ان الوقت كان الفجر الا انه على عمرودياب جدا ورمى نفسه على السرير وادامه رقم مروة وحط الموبيل فى حضنه وكان جواه مشاعر كتيرة اوى فى وقت واحد فرحان طاير مش مصدق قلقان متوتر قلبه بيدق وفضل حازم يفكر فى كل حرف ويفتكره ويعيده فى باله من تانى لحد ما راح حازم فى النوم.


صحى حازم تانى يوم متاخر على العصر طبعا سهران طول الليل ومش مصدق نفسه من اللى حصل وجرى على موبيله وقلق اوى لما ملقاش ولا رنة ولا رسالة من مروة وفكر يا ترى زعلت منى بس هى قالت هى كمان بتحبنى طب مامتها سمعتنا طب هى مش هتكلمنى تانى وفجاة رن الموبيل وهى مروة قام اتصل فى ثوانى الو مروة انتى ين من الصبح سورى لسه صاحية اطمن انها معملتش اى حاجة من اللى افتكرها وهدى وحشتينى اوى وانت كمان واشوفك بالليل قالتله اوكى وعايزاك ضرورى يا ريت تدخل النهاردة بدرى على النت عشان نتكلم اوكى يا مروةوباى باى.


قعد حازم يفكر يا ترى عايزانى فى ايه وليه عايزانى بدرى مش مشكلة هستنى لحد بالليل وهعرف كل حاجة ان شاء الله


3 
Pīńķÿ Fļŷ

الفصل الثالث : البحث عن الحب والارتباط:



مخرجش حازم مع صحابه وفضل قاعد على الكمبيوتر بيلعب و يسمع طبعا عمرو دياب كالمعتاد ويعدى الوقت ويجى الميعاد وتدخل مروة ويبدا الحوار ازيك تمام انتى عاملة ايه تمام. ايه خير كنتى عايزانى النهاردة فى حاجة مهمة...اه احنا اتسرعنا ونسينا حاجات كتيرة اوى مهمة ...زى ايه يا مروة....يعنى احنا اصلا حبينا بعض ازاى واحنا ع...مرنا ما شوفنا بعض و لا نعرف اخلاق ولا طباع بعض وكمان فى مشكلة تانية انا من القاهرة وانت من اسماعيلية يعنى كمان مش فى بلد واحدة...صح معاكى حق بس ليها حل يا مروة....ازاى؟؟؟
اولا انا ممكن ابعتلك صورتى وانتى كمان تبعتيلى صورتك وانا بنزل القاهرة على طول انا قرايبى هناك وبنزل لوحدى كتير ومع صحابى دايما...بجد با حازم خلاص احنا نتقابل على طول وسيبك من الصور...اوكى نحدد يوم وميعاد وهجيلك بس ربنا يستر ومحدش فينا يجرى من التانى لما نتقابل.....ههههههه لا انا خلاص مهما يحصل مش هغير راى انت بقى هتغير رايك انت حر...لا يا ستى انا كمان عمرى ما هغير راى مهما حصل بردو.
طيب النهاردة ايه ...الثلاثاء...طيب ايه رايك الجمعة الجاية انا معنديش دروس وهخرج بدرى ينفع تيجى؟؟؟
خلاص اوكى انا هرتب واظبط نفسى وهكلمك اقولك بس هنتقابل فين.......انا رايحة نادى الشمس ايه رايك تيجى معايا ...اوكى ماشى بس نتقابل فى مكان برة الاول بعد كدة نشوف هندخل ولا لا...انت بردو مصمم تطمن الاول هنعجب بعض ولا لا هههههه....ههههههههه لا والله يا مروة بس يعنى عشان نعرف بعض الاول ونمتص صدمة اللقاء الاول وبعد كدة نشوف نروح فين.....اوكى يا حازم زى ما تحب يبقى نتقابل عند كنتاكى اللى ادام بوابة 2 الاول الساعة 8 اوكى...خلاص اوكى هكلمك بردو ااكد عليكى قبلها ...اوكى اتفقنا...يلا انا هقوم بقى عشان ماما هتصحى باى...اوكى خدى بالك من نفسك...وانت كمان.


قفل حازم وطبعا طاير من الفرحة اول مرة هيروح ويقابل بنت وكمان هى اللى طلبت تشوفه ويمشى معاها ويكلمها كدة ادام الناس كلها بس فجاة قلق اوى من انها ما تعجبش بيه ولا ميعرفش يكلم كالعادة وكل حاجة تبوظ وتنتهى بعد ما صدق يلاقى حلمه اللى بيحلم بيه من زمان بس اطمن لما افتكر كلام مروة من انها مهما حصل مش هتغير رايها وكمان فكر انا مش وحش بالعكس دة فى ناس بتقولى انت امور صحيح هما قرايبى بس مش مشكلة بس مين هيقولى انت امور انا عمرى ما عرفت بنات اصلا عشان حد يقولى كدة انا هتعب نفسى ليه انا هسيبها وزى ما تيجى تيجى بقى وربنا يستر.

صحى حازم ونزل الجامعة وما رحش كليته راح الجامعة القديمة كلية التربية وطب اسنان عند صحابه حسام وابراهيم وسامح واول ما شافهم بقولكو ايه هو انا شكلى امور؟؟؟ ايه يا واد انت اتهبلت ولا ايه مالك يا جماعة بس ردو عليا شكلى امور او مقبول طيب بلاش امور...ايوة يا عم شكلك مقبول بطل بقى هبل انت هتجوز ولا ايه مالك...لا مفيش بسال عادى والله...شكل دماغك مسافرة على الصبح كدة...لا يا عم سوال وجه على بالى خلاص انسوه بقى...طيب المهم ايه نظامك الخميس رايحين النادى معانا والا ايه؟؟؟ اه معاكو بس الجمعة مش هاجى...ليه كدة؟؟؟ مسافر القاهرة...ليه رايح تعمل ايه ولا شكلك كدة الموضوع فى حريم مش مطمنلك...حازم بعصبية لا يا عم حريم ايه انا مليش فى الكلام دة انت عارف بس كان حازم من جواه فرحان دة الناس بدات تساله اهو اسئلة مكنش عمره حد بيسالهالو وبنات وكدة وشكله هيبقى عنده حكايات زيهم ويمكن احسن منهم كمان.


وعدى يوم الاربع والخميس وخلاص فاضل يوم على الميعاد وحازم فى اوضته بالليل والساعة 12 بالليل وهو ادام الدولاب محتار.....يا ترى هلبس ايه تى شيرت وجينز ولا هلبس قميص لا دة مش حلو ولا دة وبلاش دة لا ايوة هلبس القميص الازرق وعليه البنطلون الباجى البيج ببقى حلو فيهم...ايوة تمام كدة بس هعمل شعرى ازاى زى ما هو كدة ولا ايه لا انا عايز اعمل فيه حاجة جديدة اول مرة هتشوفنى فيها مروة هى اللى هتثبت فى دماغها على طول لازم اكون حاجة جامدة اعمل ايه اعمل ايه اه بس انا هوقف شعرى وهعمله سبايك هيكون شكلى فيه جامد انا مرة عملتها وكل صحابى قالولى عالى اوى يا مان كدة اشطة. خلاص بكرة قبل ما اسافر اروح اعمله سبايكى زى عمرو دياب فى اكتر واحد بيحبك.

ويرن الموبيل ويجرى حازم وينط عليه الووووووو.......ما تكسفنيش بقى.........هههههههه بتكسف يا بيبى........ مروة اه صح بكرة لو اتكسفت ومعرفتش اكلم عادى ها.....انت مش هتعرف تكلم دة انت لسانك اد كدة........هههههه لا والله يا مروة انا فى الحقيقة حاجة تانية خالص.......انت هتخوفنى ليه حاجة تانية ازى....يعنى بكسف اوى ومش بعرف اكلم كويس خصوصا مع البنات...يا سلام طب خلى حد تانى يقول الكلام دة انت بتكسف مع البنات........حازم فى سره(هو فين اصلا البنات دول) اه طبعا بكسف اوى........هههههههه ماشى يا عم المكسوف تعالى انت بس وانا اللى هكلم. طيب ماشى اتفقنا...خلاص هستنا بكرة 8 بالظبط اوعى تتاخر عليا... لا 8 ان شاء الله هتلاقينى عندك اوعى انتى تتاخرى...اوكى اتفقنا يلا باى ...باى مروة...


ويخبط الباب وتدخل مامة حازم. ايه دة انت خارج ولا ايه لا يا ماما دة انا مسافر بكرة مع حسام والعيال رايحين القاهرة تغيير يعنى فا كنت بشوف هلبس ايه. ماشى بس خدوا بالكو من نفسكو انتو رايحين بعربية...اه يا ماما عربية سامح...طب خليه يسوق براحة والنبى...حاضر يا ماما ما تخافيش عليا ان شاء الله... طيب يلا تصبح على خير...وانتى من اهله يا ماما ...ماما....نعم...هو انا امور؟؟؟ انت قمر يا حبيبى طبعا...ربنا يخليكى يا ماما.



صحى حازم ونزل صلى الجمعة وفضل يدعى يا رب اعجب مروة وتعجبنى وكلامى يعجبها يا رب وفقنى فى المقابلة دى.وتخلص الصلاة ووقف مع صحابه شوية واتفقو يلعبو كورة ولعب معاهم بعدين خلص اللعب وراح جرى عشان يظبط شعره ويعمله سبايكى لزووم اللوك الجديد وبعدين لبس اللبس اللى اختاره ونزل عشان يركب القاهرة و يلحق معاده وهو طاير من الفرحة وفى نفس الوقت خايف من المقابلة وفى باله مليون سوال.

المرة الجاية هنشوف حازم لحق معاده وايه اللى حصل فى لقاء القمة دة بالظبط ويا ترى اعجبو ببعض ولا كل واحد جرى فى طريق



أدوات الموضوع
انواع عرض الموضوع


الساعة الآن 10:06 AM.



Powered by vBulletin® Copyright ©2000 - 2014, Jelsoft Enterprises Ltd.
Search Engine Optimization by vBSEO ©2011, Crawlability, Inc.
المواد المنشورة فى هذا الموقع لاتعبر بالضرورة عن وجهة نظر الإدارة وإنما تعبر عن وجهة نظر كاتبها.